ТҰЙЫҚ ЖЕЛІ ҚОНДЫРҒЫЛАРЫНДА ТҰҚЫ БАЛЫҚТАРЫН ӨСІРУ МЕН ӨСІП-ДАМУЫН ЗЕРТТЕУ

Аңдатпа

Бұл мақалада тұйық желі қондырғысы (ТЖҚ) жағдайында тұқы балықтарын өсіру ерекшеліктерін және олардың өсуіне, дамуына және бейімделуіне әсер ететін факторларды зерттеу нәтижелері ұсынылған. Зерттеу барысында су температуралық режимі, гидрохимиялық көрсеткіштер (ерiген оттегінің мөлшері, аммиак, нитриттер мен нитраттардың концентрациясы, pH деңгейі), онтогенездің әртүрлі кезеңдеріндегі өсу динамикасы, сондай-ақ әртүрлі азық түрлерінің өнімділік пен азықтық конверсия коэффициентіне әсері талданды. Сонымен қатар, тұқының тұйық жүйе жағдайына бейімделу мүмкіндіктері физиологиялық және мінез-құлық көрсеткіштері бойынша бағаланды. Зерттеу нәтижелері тұқының қарқынды өсуі үшін оңтайлы температуралық диапазон 22–26°C аралығында екенін көрсетті, бұл кезде тәуліктік орташа салмақ қосу көрсеткіштері ең жоғары деңгейге жетеді. Тұрақты гидрохимиялық параметрлерді (O₂ — 6–8 мг/л, NH₃ < 0,02 мг/л, NO₂⁻ < 0,1 мг/л, NO₃⁻ < 50 мг/л) сақтау жоғары тіршілік сақталуын және өнімділікті қамтамасыз ететіні анықталды. Ең қарқынды өсу 4–6 айлық жаста байқалатыны, ал ең тиімді коммерциялық азық — ақуыз мөлшері 35% болатын экструдирленген азық (FCR 1,2) екені белгіленді. Сондай-ақ, тұйық желі қондырғысы жағдайына бейімделу 2–4 апта ішінде аяқталатыны анықталды. Алынған деректер тұйық желі қондырғыларында тұқы өсірудің технологиялық регламенттерін әзірлеуде, температуралық және гидрохимиялық режимдерді оңтайландыруда, азықтандыру жүйелерін жетілдіруде, сондай-ақ аквакультура саласындағы ғылыми зерттеулерде қолданылуы мүмкін.